8 limerieke
Sannie en Jan van Dawidskuil
Het dae met leeglê verwyl
Niks wou hulle doen
Buiten slaap en soen
Nou’s die wêreld van kleingoed vervuil
Die Heer Wolraad Woltamaties
Voer sy perd wors en sosaties
Dan spring hy see-in
Soek na ‘n meermin
Maar kry net krap en karkatjies
Mollige Gertruida de Waal
Se fiets het ‘n dubbeldoor saal
Sy ry op haar fiets
Met Wagter en Kiets
En hop soos ‘n bal as sy val
Twee tantes klim uit ‘n bus uit
Die een is so maer soos ‘n fluit
Die koeëlronde een
Mevrou Bets van Veen
Eet veel eerder koek as beskuit
Die blondekop met kaalvoete
Betaal nooit ‘n verkeersboete
Sy knik net haar kop
Versuim om te stop
En druk verwoed op haar toeter
Op Duits is ‘n lepel ‘n löffel
‘n Aartappel heet ‘n kartoffel
Die taal wat hul praat
Maak die kêrels kordaat
Afrikaans vir vry is kafoefel
Loslit Babs van Bethulie
Sweer sy het dit nooit bedoel’ie
Moenie vergeet’ie
Sy sê sy weet’ie
Wat haar boep nou so laat stoel’ie
Grootkoos van Putsonderwater
Laat die nooiens giggel en skater
Daar bly skaars ‘n broek
Of droë sakdoek
En gaan hoe later al kwater
© Piet van Rooyen