Aankoms
Wanneer ’n man en ’n vrou mekaar laat
in hul lewens ontmoet,
is daar weinig eerstes om agterna
te onthou.
Dit is om in die pad om ’n draai te kom.
Om hulle strek ’n gans ander landskap,
maar helaas, dit bly altyd vergelykbaar
met ’n voorafgaande.
Wanneer ’n man en ’n vrou mekaar laat
in hul lewens ontmoet,
is soveel laastes hulle wel beskore.
Dit is soos om oor die hoogte te kom,
en die eindbestemming in ’n helderte
voor hulle uitgestrek te sien.
Vreemd genoeg is aankoms
reeds ’n afskeid.
© Louis Esterhuizen / 2026