Francois de Jongh is gebore te Kakamas 14/03/51. Hy matrikuleer in 1968 aan Paul Roos Gimnasium en voltooi sy BA SOD aan die Universiteit Stellenbosch in 1973.
Hy gee onderwys in Villiersdorp en verskeie plattelandse Karoo-dorpe en tree uit as Departementshoof by Worcester Gimnasium 1996. Hy werk ook as poësie redakteur van Graffier (Nasionale literêre tydskrif vir jong skrywers(1979-82).
De Jongh verlaat die onderwys in Desember 1996 en vestig in Gansbaai as eienaar/uitgewer/redakteur van Gansbaai Courant. In 2008 word hy bekroon met die Sanlamgemeenskapsperstoekenning as die wenner in die afdeling Kontreinuus. In 2016 verkoop hy Gansbaai Courant na 20 jaar.
Hy woon tans in Sedgefield.
Van De Jongh se werk word in Standpunte (mondstuk van Afrikaanse skrywersgilde) gepubliseer en hy debuteer in 1982 met die digbundel Klipsweet (Perskor).
Van sy gedigte is ook ingesluit in die versamelbundel Groen (1990), DJ Opperman se Groot Verseboek en Andre P Brink se Groot Verseboek 2000. Hy skryf ook die lirieke vir Worcester Gimnasium se skoollied (1994). Sy nuutste digbundel, Konglomeraat (Naledi) verskyn in 2019.
In 2021 stel De Jongh saam met Daniël Hugo die pandemie bloemlesing, Maskers en Mure (Turksvy 2021) saam.
Ontmasker
covid 19 chemo 20
vir my ingebondel
in een jaar
ingeperk vergif
hou die bees
in sy kraal
‘n kudde hol wild
as versperrings faal
vrees uit oë straal
vlug vir identiteitsroof
die merk van die bees
òf is antidote
Gods ontferming
2 Januarie 2021
© Francois de Jongh
Betowering
Sedgefield
vleiloerie lowerroep
verras met borrelende
kaskadewaternote
in die strandmeerkom
tussen twee oeroue
versteende duine
dié hoogste bewoud
met lang witgestamde
regop bloekombome
en klossies loof
op kroontakke
waarbo arende
rustig kolksweef
maar vleiloerie
se wiegeliedjie
sus voëlkuikens
in hul nes
en skeurbekvreet
nes die arend
aan sy prooi
© Francois de Jongh, 31 Julie 2020
Nuwe Normaal
‘n Puntdig
wat was is
steeds
maar met ekstra
hoek en sinker
gelood
in vrees
die dood
van vlees
omgewingsvreemd
agter lapmaskers
bo-oor dit
wat reeds
vermom is
© Francois de Jongh, 14.08/20