Posts Tagged ‘MC Escher gedig Joan Hambidge’

Joan Hambidge. Hande wat teken

Monday, August 23rd, 2021

 

 

 

 

Hande wat teken M.C. Escher 1948

 

Die linkerhand weet oënskynlik nooit

wat die regter een nie reeds weet nie;

omdat die onbewuste (soos Jung kort

hierna sou uitwys) die scintillae as idee,

iets van die mundi future seminarium

naboots, nateken, belig, voorspel.

On the nature of the psyche van Carl Gustav

verduidelik iets van Maurits Cornelius

se beheptheid met orde en versoening.

Bewus of onbewus? Simbolies of letterlik?

Toevallig val my boek oop by entropie:

entropies slaan my boek toevallig toe.

 

© Joan Hambidge, 2021