Posts Tagged ‘Pieter Hugo gedig a la Pablo Neruda’

Pieter Hugo. Soos ‘n handvol wit van die maan

Tuesday, November 16th, 2021

 

SOOS ‘n HANDVOL WIT VAN DIE MAAN

 

Ek sien haar sit op ‘n sypaadjie

in Lwandle

by haar stalletjie

die vrou wat beestepote skoonskraap

 

Ek sien dit in die houding van haar rug

in ons oogvang met my verbyry

 

Vir ‘n oomblik

is ek Bottichelli

en sy is

soos ‘n handvol wit van die maan

 

 

(Titel uit Nie net die vuur nie, p. 43, Vandag is boordensvol, Pablo Neruda in Afrikaans)

 

© Pieter Hugo, 2021

 

Pieter Hugo. ‘n Treurende dag val uit die klokke

Monday, November 15th, 2021

 

‘n TREURENDE DAG VAL UIT DIE KLOKKE

 

‘n treurende dag val uit die klokke

en beier oor die stomme horison

ek strompel voort deur herhaalde skokke

‘n treurende dag val uit die klokke

jou stem verstil met als wat ons nog kon

‘n treurende dag val uit die klokke

ek steier oor die stomme horison

 

(Titel uit Herfs kom terug, p. 101, Vandag is boordensvol, Pablo Neruda in Afrikaans)

 

 © Pieter Hugo, 2021

 

Pieter Hugo. Daardie uur sonder uur

Sunday, November 14th, 2021

 

DAARDIE UUR SONDER UUR

 

asof jy in die middel van ‘n sin

my in die rede wil val met iets,

iets verrassend wat jy onthou,

wat te mooi is vir woorde,

maar jy dit perfek ampersê

met jou bolip wat,

effe oopgetuit,

versag tot ‘n binneglimlag

 

en ons vlieg

in daardie uur sonder uur

 

 

(Titel uit Orinoco p. 110, Vandag is boordensvol, Pablo Neruda in Afrikaans)

 

© Pieter Hugo, 2021