Binneblik, ‘n blik die son in. Dis nou wel nie somer nie en Yskor het lankal die fabriek in Pretoria gesluit, maar vanoggend se son van die balkon af het my aan ʼn ou liriek herinner. Dit kom van my CD “Insomniak se droomalmanak” af en vreemd genoeg was hierdie een vir ʼn tydjie op RSG se playlist. Die werklikheid wat te helder skyn is natuurlik by Etienne Leroux gesteel.
DEUR ‘n DONKERBRIL
Dis somer in Pretoria, die son skyn skerp
YSKOR gloei ‘n hoogoond teen die skemer
Dis weer somer in Pretoria, die son skyn te skerp
teen die lense wat ek dra voor my oë
Ek kyk na die wêreld deur ‘n donkerbril
dis al wat ek kan doen om te keer
om die werklikheid te sensor, te bestuur, te beheer
want die beelde skyn te skerp vir my
Die staatsdiensgeboue staan soos leggerkabinette
en wag vir die volgende dag se nuwe wette
Ek sit in my Volla en wag vir die lig
wat sê ek kan aangaan met my daaglikse plig
Ek kyk deur die walms met ‘n donkerbril
dis al wat ek kan doen in verkeer
om die werklikheid te sensor, te bestuur, te beheer
want die ligte skyn te skerp vir my
Ek sien boeke en stoele en penne en ‘n baas
wat my dophou oor sy bril en wag om te raas
Ek wag vir teetyd en vir tjailatyd
dis al hoe ek oorleef in die roetinestryd
Ek kyk na die wêreld deur ‘n kameralens
fokus in en verklein
ek fokus in skadu’s van swart en wit
want die beelde is te helder vir my
Ek kyk na die wêreld deur ‘n donkerbril
dis al wat ek kan doen om te keer
om die werklikheid te sensor, te bestuur, te beheer
want die beelde skyn te skerp vir my
Hendrik, nou maak jy my dag ook. Dis so lekker om te weet iemand luister daarna!
Andries, toevallig het die song nou net oor my iPod gespeel, ek het die “musiek sonder grense” album ‘n rukkie terug gekoop. Ek het die lirieke ge-google en hier ge-eindig. Al wat ek wil se^ is: dankie, jy het my dag gemaak.
Dankie Annet!
Skitterende liriek Andries!
Hou van:
Die staatsdiensgeboue staan soos leggerkabinette
en wag vir die volgende dag se nuwe wette