Lucie Möller. Twee gedigte
toe vlermuise landingsplek soek
New York, Januarie 1998
tussen Macy’s en Bloomingdales
lê die strate snakkend na ‘n sneeustorm
elke paar tree swart sambrele
soos geknakte vlermuisvlerke:
die ontoegevoudes.
En aan die bome opgerank
skitterliggies polsend:
vuurvliegies uit Anderland.
*
Kango
waar die waterige oog
terug eb deur die fyn vag
van varings en fynbos
by spelonke van die harsings in
is die kalkwond deursypel
tot poele op ‘n grotvloer
waarin druppels lig en silwerig
soos vislywe roer
met oë rond gebult
en blink teen die ragwerk
van ‘n druppende berg.
© Lucie Möller. November 2009
