Louis Esterhuizen wen die Proteaprys vir Poësie vir 2011

 Louis Esterhuizen

Tydens die 7de jaarlikse Versindaba wat op die kampus van die Universiteit van Stellenbosch gehou word, is die Proteaprys vir Poësie vir die beste Afrikaanse digbundel van 2010 op Saterdagaand 24 September 2011 by die Lanzarac Hotel, vir die sewende keer oorhandig. Die wenner is vanjaar Louis Esterhuizen vir sy bundel wat die water onthou.

Baie geluk, Louis!

 COMMENDATIO (opgestel deur prof. Henning Pieterse):

Water, as oerbron, as heilige en geduldige element, is die sentrale beeld in hierdie bundel. Tematies word hierdie simbool en metafoor – met betrekking tot binding, ontkieming, begin, einde, lewe en dood, kuns, geheue en liefde – regdeur in fyn afgewerkte, liriese verse ontgin, onder meer by wyse van talle see- en rivierbeelde en metafiksionele “akwarelle”. Kaplinski se woorde “No self. Water again water” en reëls uit Van Ostaijen se “Melopee” word vernuftig verwerk in gedig na gedig. Telkens word verskeie fasette van water ingespan in verse oor jeugherinneringe en dan, veral, die liefde. wat die water onthou is ‘n hoogtepunt in Louis Esterhuizen se oeuvre en ‘n waardige wenner van die Proteaprys vir Poësie.

DIE PROTEAPRYS VIR POËSIE

  • Die prys word elke jaar toegeken vir die beste Afrikaanse digbundel wat by enige uitgewer gedurende die vorige jaar verskyn het.
  • Alle gepubliseerde digbundels gedurende die vorige jaar tot en met Januarie van die jaar waarin die prys toegeken word, verskyn het, kom outomaties in aanmerking.
  • ‘n Bundel word dus eenmalig oorweeg vir die prys.
  • Bloemlesings, versamelde werke, vertaalde werke en herdrukke kom nie in aanmerking nie.
  • Dieselfde digter mag die prys meer as een keer (vir verskillende bundels) ontvang.
  • Die beoordelaarspaneel bestaan uit drie lede wat deur Protea Boekhuis aangewys word. Vanjaar was dit Charl-Pierre Naudé, Marlies Taljard en Henning Pieterse.
  • Die prys bedra R10 000 en ‘n geraamde protea.

 

Die volgende bundels was vanjaar onder die aanspraakmakers op die prys: Johan Lodewyk Marais met Diorama en Melt Myburgh met oewerbestaan. Myburgh het tydens die Versindaba wel die Ingrid Jonker-prys vir sy debuutbundel ontvang.

Die Proteaprys is voorheen aan Charl-Pierre Naudé (2005), Gilbert Gibson (2006), Antjie Krog (2007), Loftus Marais (2009) en Breyten Breytenbach (2008 en 2010) toegeken.

Lees die onderhoud wat Andries Visagie met Louis Esterhuizen gevoer het

oor sy digbundel wat die water onthou.

Volg ook die digstring van een van die gedigte uit die bundel.

wat die water onthou

wat die water onthou

Bookmark and Share

18 Kommentare op “Louis Esterhuizen wen die Proteaprys vir Poësie vir 2011”

  1. Marga Collings :

    Baie, baie geluk, Louis!

  2. Baie geluk, Louis! Ek is verskriklik trots!

  3. Jasper van Zyl :

    Hel, Louis, dis ‘n grote! Baie geluk!

  4. Breyten Breytenbach :

    Skote Petoors-Esterhuizen! Nou net die nuus gekry hier in die verre noorde van Algiers, en ek gaan nou sommer weer in die laatnag ‘n kroeg probeer kry vir ‘n heildop – wat dalk ‘n probleem gaan wees in ‘n onthouende land, maar dis die moeite werd en dit maak die tong en die hartskubbe warm. Geluk!!!

  5. Die water onthou, maar die wyn vergeet. Baie dankie vir gisteraand se wyn. En, o ja, baie geluk!

  6. Desmond Painter :

    Baie geluk Louis! ‘n Mooi bundel en waardige wenner.

  7. carina :

    Die ATKV-veertjie het verby gegaan, maar die Protea-prys het vas bly steek! En ek vra my af of die 2de nie ‘n groter eer is nie? Maar natuurlik mag mens nie pryse met mekaar vergelyk nie. Hoe meer pryse vir Afrikaanse letterkunde hoe beter. GELUK LOUIS, ook vir Marlise en haar skilderaksies, waarsonder hierdie bundel seker nie so goed tot stand sou kom nie. Julle is ‘n uitsonderlike paartjie!!!

  8. Cas Vos :

    Louis, vat vyf. Van harte geluk met die prys. ‘n Bundel suiwer soos water. Mag jy net soetheid proe.
    Cas Vos

  9. melt myburgh :

    Baie geluk, Louis. Dankie dat ons kon deel in die viering.

  10. Louis – handeklap & wolwefluit, dis ‘n welverdiende prys! Ek is so bly saam met jou.

  11. Louis :

    Dankie vir al die gelukwensinge hierbo … En ja, inderdaad gróót feesvieringe hierdie kant. Dankie ook aan almal wat die aangeleentheid so spesiaal gemaak het vir my en Marlise. Watter onvergeetlike fees was hierdie Versindaba-naweek nie gewees nie! Onverdunde vreugde van begin tot einde. 🙂

  12. Rene Bohnen :

    Baie geluk Louis! Mag die vreugde bly vloei:-)

  13. Lewies Botha :

    Baie geluk Louis

  14. Danie Marais :

    Baie geluk, Louis! Welverdiend.

  15. Andries Bezuidenhout :

    Baie geluk Louis!

  16. Francis: :

    Baie geluk Louis. My eksemplaar van die bundel is toe nog nie geteken nie…sal dit saamdra na die volgende geleentheid.

  17. Chris Coolsma :

    Geluksvoël! (ek waag nie om die woord ‘bofkont’ nog te besig in hierdie geselskap nie). Ek het daardie 8 bundels opgestapel op ‘n tafel en ‘n heildop (heilfles) geoffer aan die geluksgode.

  18. Chris Gilfillan :

    Wat ‘n prestasie, welverdient.

  •