DHOW-WEDVAART, LAMU
‘n Gesoute seekaptein ken sy dhow
en van jongs af die name van die wind.
Tydens die wedvaart gee hy net meer tou.
Romp en mas is op die eiland gebou,
wat die deelnemers aan dié ambag bind.
‘n Gesoute seekaptein ken sy dhow.
Tien bemanningslede sny die diepblou
branders om die wenstreep te kan vind.
Tydens die wedvaart gee hy net meer tou.
Soms as jy praat, luister die boot na jou
en skiet vooruit sodat die toue kwint.
‘n Gesoute seekaptein ken sy dhow.
Vandag moet iedereen verbete klou
wanneer die sproeireën hulle verblind.
Tydens die wedvaart gee hy net meer tou.
“Gooi water dat die seil hard word, en hou!”
spoor hy aan. “Op die kaai waai vrou en kind!”
Tydens die wedvaart gee hy net meer tou.
‘n Gesoute seekaptein ken sy dhow.
© Johann Lodewyk Marais. 2011
‘n Villanelle – soos ‘n goeie dhow aanmekaargesit! JLM, toe ek daar was het ek Matondoni gaan besoek, waar hulle eeue lank al dhows vervaardig. Dis op Lamu se eiland, maar nader aan die deel wat vasteland toe kyk, as ek reg onthou.