De Waal Venter. Cave verbum
Cave verbum
Ek het dit nie verwag nie.
Die skielik bytende pyn
het ‘n hoë gil
uit my bors gepers;
‘n woord het my gebyt.
Dit het dadelik begin bloei.
Ek het verdwaas
gekyk na die bloed
wat ‘n klein, gloeiend rooi
stroompie teen my arm af gemaak het;
‘n woord het my gebyt.
Ek het dit nie verwag nie;
ek werk elke dag met hulle,
speel met hulle, rof
partykeer, maar maak hulle nooit seer nie;
maar nou
het ‘n woord my gebyt.
Dit is nie ‘n baie harige woord nie,
ook nie luid of skouspelagtig nie;
jy kry hom orals,
ek het hom al baie voorheen gesien,
tog het hy my gebyt.
Hier is hy –
hou.
© De Waal Venter. 2012
