De Waal Venter. Darwin tob
Darwin tob
Daar is nie veel
te kies
tussen die twee vinke nie,
dag die jong Darwin.
Dieselfde spesie,
tog is die een beter aangepas
om saad te vreet,
die ander om insekte op te spoor
in die vals veiligheid
van boombas-tonneltjies.
Dit het hom laat dink
aan die kaptein
en sy geliefde in die vaderland.
Dieselfde spesie,
maar hy sou eerder trou met die een
en nie die ander nie.
As mens die kaptein selektief kon teel …
hy het die gedagte probeer onderdruk,
maar kon dit nie regkry nie …
sou mens ‘n wetenskaplike kon kry,
‘n staatsman of, minder waarskynlik, ‘n biskop.
Die vrou, het hy skuldig gedink,
sou versigtig uitgesoek moes wees.
Hy het ‘n hoofpyn opgebou,
in sy stryd om biologie te skei
van beskaafde gedrag,
etiek, godsdiens en moraliteit.
Sy hoofpyn het erger geword
soos hy al hoe meer besef het:
biologie is nie in die minste
bekommerd oor etiek, godsdiens of moraliteit nie,
dit beskou sulke dinge
as maaksels van die menslike denke –
vlugtige beskermende kleure.
© De Waal Venter. 2012
