Carina Stander.stiljag

Illustrasie deur Alberto Vazquez

   

stiljag

my roofvoël stiljag:
wag kloue ingetrek
en stip

want ek het beloof
die prooie kom
die prooie uit die bergland kom
knaagdiere met stippelspore
kom soos klankryke klinkers

en anderkant die struike
ruik slange se spleettonge 
die lug –
vlug voor gerugte van sy skaduwee

op die boekeberge wei my verse
waar die roofvoël haastig wagtend waak –
sterre wat swerm bo sy kop

my roofvoël my vers
moenie dat vrese ons jag nie;
koggelmanders en koggelaars
sal straks ons berg se hakskeen lek

saans slaap ek in die rotskamers onder jou kranse
en soggens pluk ek vir jou voëltjies
met ‘n fyn-fyn rym –
beweginglose bont stiltes

as jy net weer sal sweefstyg
as jy eenmaal weer jou vlerke oopspalk soos ‘n kruis
kan ons saam die warm lig en lugstrome aanbid;
ons kan valke beroof, ek en jy
en die bome voller laat loof as tevore

eendag sal my vingers weer soos vere sprei
en ek sal skryf in offersand –
‘n woord soos “stiljag” in my hand

 

Wednesday, January 30th, 2013 | Gedigte.

Both comments and pings are currently closed.
Bookmark and Share

4 Kommentare op “Carina Stander.stiljag”

  1. gert van eldoraigne :
    January 30th, 2013 at 7:00 pm

    ongelooflik

  2. Carina Stander :
    February 11th, 2013 at 3:33 pm

    Vanmiddag gehoor ek’t 3de gekom in Versindaba & Cordis Trust se beelddigkompetisie. Dis die 2de gedig wat ek in 2 jaar pleeg & ek’t al beginne wonder of ek ooit weer kan/ gaan dig. (Dis dan ook waaroor die gedig gaan – die stiljag na ‘n gedig.) Nou ja, mens kan dit amper nie verhelp nie, maar sulke stukkies erkenning is tog goed vir die moed:). Hier’s die skakel: https://versindaba.co.za/2013/01/30/beeldgedig-42-stiljag/

  3. Estelle Bester :
    February 11th, 2013 at 10:39 pm

    Carina, moet asseblief nooit ophou gedigte pleeg nie! Dit is baie besonders – geluk.

  4. Tanja uit Oz :
    February 12th, 2013 at 2:08 am

    Uitstekend! Baie geluk! ‘n Mooi afrikaanse gedig is ‘n rare verskynsel in ons hedendaagse samelewing! Hou so aan!