Die Heilige Lydingdraende Koninklike
Martelaar, Tsarewitsj Alexei (1904-1918)
Feesdag 17 Julie (= 4 Julie op die Juliaanse Kalender)
Min weet jy, Tsarewitsj, wat vir jou wag,
jy wat lankmoedig ly aan bloed wat nie stol,
wat versigtig jou poetse moet bak, bedag,
altyd bedag op die rooi verspreidende kol.
Min weet jy hoe die Bolsjewis oor jou voel,
van sy haat vir jou ouers, susters en vir jou,
hier waar jy speel met jou geliefde spanjoel
in jou matroospakkie – kyk, die wit en blou.
Min weet jy, Aljósja, wat hulle vir julle beoog
met hul bajonette, koeëls en verterende suur,
hulle wat glad nie mededoë ken of gedoog,
maar stry of spog oor wie die doodskoot vuur.
O jy wat dapper moes staar in die loop se git,
kyk net hoe wapper weer die rooi, blou en wit.
© Jacobus van der Riet / 2014