Wicus Luwes. Oktoberfest in Münchenistan

oktoberfest-logo
Die ‘craft’-bier fenomeen is nog altyd vir my interessant. Ek maak ‘n punt daarvan om ‘n restaurant se eie bier te drink, of ten minste te proe, wanneer ek by plekke aandoen wat ‘n tuisbrouery of in-huis brouery het. As student het my vriende hulle eie bier probeer brou in klein Sputnik-wasmasjiene. Die Sputnik-wasmasjien was ‘n klein hand-aangedrewe wasmasjien wat drukking opgebou het deur ‘n slinger te draai. Die Sputnik-bier was ongelukkig nie ‘n groot sukses nie. (Die drukking in die wasmasjien het opgebou tot op die punt dat die wasmasjien gekraak het.) Jy kry ook die ‘craft’-bier ouens by feeste en ander geleenthede. Ek het by een so fees ‘n man ontmoet wat drie verskillende biere gebrou het. Hy het trots oor die toonbank kliënte nadergeroep. Ek het ‘n gesprek aangeknoop met die man en hy het my die geskiedenis van elke soort bier probeer verduidelik. Jy kan sien wanneer dit iemand se eie besigheid is en wanneer daar slegs iemand aangestel is om ‘n stalletjie te beman. Baie van die ‘craft’-biere is bedoel as ‘n ekstra inkomste. Ek het ook nou al oor die jare geleer dat die term ‘brouery’ eintlik kodetaal is vir ‘garage’ of ‘tuinstoor’ – nie dat dit iets aan die kwaliteit of smaak verander nie. Inteendeel, wanneer die bier verkoop word, moet dit gereeld deur Doeane en Aksyns getoets word. Ek wonder altyd wat ‘n goeie Afrikaanse woord vir ‘craft’-biere is, want tuisbier of tuisgemaakte bier laat my te veel aan gemmerbier dink. Daar moet iets van die ‘craft’ vasgevang word, want dit is ‘n soort kuns om ‘n goeie bier te maak.

Ek wonder verder of die deursnit Suid-Afrikaner se voorliefde vir bier by ons Duitse voorouers begin het. Duitsland en spesifiek München is bekend om die jaarlikse Oktoberfest. Die eerste ding wat my altyd opval omtrent die fees, is dat dit grotendeels in September val. Dinge soos die Russiese Oktober-revolusie wat in November val, pla my omtrent op dieselfde vlak, maar in die Russiese geval kan ‘n mens dit verstaan, aangesien hul kalender deur die jare verander het. Hoe dit ookal sy, die Oktoberfest vind jaarliks in Munchen plaas.

Die Rand/Dollar wisselkoers vorseer die meeste mense, wat die Oktoberfest persoonlik wil beleef, om eers ‘n bietjie te spaar. Terwyl jy en ou vriende spaar vir die geleentheid kan julle jul gedagtes laat gaan en inleef in ‘n soort tuis Oktoberfest – ‘n soort eksperiment van die gedagtes. Voorbeelde van gedagte-eksperimente is Schrödinger se kat en meer onlangs ons eie (uittredende) Eskom-hoof, Brian Molefe, se Saxonwold Sjebien. Die sjebien, indien dit bestaan, is die perfekte plek om ‘n Suid-Afrikaanse Oktoberfest in te vier. Dit sou goed wees om al die sintuie te betrek vir die gedagte-eksperiment en hiervoor is die reuk en gevoel van ‘n Lederhosen (tradisionele Duitse kort leerbroek) onmisbaar. Ek het ‘n paar tweedehandse Lederhosen op ‘n Suid-Afrikaanse webwinkel te koop gesien, indien jy daarvoor kans sou sien. Die volgende sintuig om te betrek, sal die gehoor wees. Gewilde liedjies sluit die volgende in: Ein Prosit (‘I salute you’) is gewild en help die gees (en verkope) ‘n bietjie aan. Jy kan jou Youtube, iTunes of Simfy-speellys hiervoor inspan. Aan die einde sou die orkes afsluit met Ziggy Zocky Ziggy Zocky en die gehoor antwoord met Oi Oi Oi. Nog liedjies vir die speellys is Fliegerlied (The Flyer Song) en 99 Luftballons. Laastens kan jy die gedagte-eksperiment afsluit met ‘n bietjie Eisbein en roomerige Sauerkraut.

Deur die loop van September en Oktober het ek het ‘n paar advertensies vir ‘n Pecanwood Oktoberfest in die Kwazulu Natalse Middellande gesien. Hierdie fees lok jaarliks ongeveer 6000 mense en kombineer bier met sportaktiwiteite. Daar is ‘n bergfietsresies, hardloop-kompetisies en 4×4-ritte om die uitstappie ‘n ekstra dimensie te gee. Ek kan insien hoe bier ‘n mens se dors kan les na die fietsry of hardloop, maar die 4×4-ritte is ‘n ander storie.

Om terug te keer na die Oktoberfest, is die vraag altyd of die bier wat jy gaan kry koud of warm is. Verskillende wêrelddele drink hul bier teen verskillende temperature, maar volgens my ongeleerde bronne, moet die bier nie yskoud wees nie. Die ideale temperatuur is volgens hierdie ongeleerde bronne ongeveer 8 grade Celcius.

Die Oktoberfest is natuurlik die ideale geleentheid om van ‘n ander kultuur te leer en ek wonder hoe die inwoners in Munchen se immigrantekamp die Oktoberfest sien. Die immigrante is natuurlik meestal Moslem en word verbied om alkohol te drink. Dit behoort eintlik nie ‘n probleem te wees nie, want daar is heelwat bekende brouerye wat alkoholvrye biere produseer. Oorwegende Moslemlande, soos Maleisië, gebruik hierdie biere in veral die toerismemark. Daar is ook produseerders wat die Moslemmark as ‘n potensiële braakland sien vir hul alkoholvrye produkte. Die eersteprys in so ‘n mark, sou die Halaalsertifikaat wees. Daar is egter ‘n paar dinge wat in die pad van die sertifikaat staat: eerstens word die alkoholvrye bier in dieselfde plek as sy alkoholiese broers gemaak. Tweedens lyk die bottels en verpakking amper identies in beide gevalle.

‘n Kompromis sou seker een alkoholvrye tent by die Oktoberfest wees, maar die wêreld is op die oomblik nie ten gunste van kompromieë nie. Die skuiwe wat op die oomblik in die wêreld aan die gang is, laat my eerder wonder of ons in die toekoms nog alkoholiese bier in party van die tente sal kan koop. Daar is dalk in ‘n dekade of twee ‘n volledige alkoholvrye Oktoberfest in ‘n plek genaamd Münchenistan. Die meeste mense vrees onsekerheid: ‘n Donald Trump in Amerika, immigrante in Europa, nuwe koue oorloë. Die era van politieke korrektheid het die afgelope tyd ‘n paar houe op die ken gekry. Die seisoene verander en die mens moet ongelukkig daarby aanpas. ‘n Brosjure vir toeriste raai besoekers aan die Oktoberfest aan om ‘n baadjie saam te neem, want Oktober is definitief nie meer somer nie en die aande kan soms koud raak.

halal-beer-malaysia-image-from-malaysian-digest

Woordverklaring

Kaar. ‘n Mooi ou Dietse woord
vir iets waarin mens kan vergaar
heuning, vis, yswater; in ‘n skuit
‘n bak vir lewendige paling
of ‘n byekoft gevleg van spaanse riet,
stingels brem en langstrooirog;
‘n nis deur sneeu uit ‘n spits geslyt
aan die bopunt van ‘n gletsergeut
met onderaan ‘n keteldal
waar, op ‘n vloer van swerfsteen,
‘n dorp kan aanslib teen ‘n meer.
‘n Tregter sonder voet
waardeur die koring
op die meulsteen stroom;
ook die mond van Sint Ambrosius
as kind waar die bye in- en uitravot
soos stille aforismes –
de bono mortis, de fuga saeculi.

‘n Vers, dink ek, waarvan mens deur
die vlegwerk loer, deur deksel,
wolke, dooie neerslag –
om voor die wyn, die brood,
die droë vis, die kiem,
die gis, die suur te kry; die gevaar
van vinne, ander spore, vars verskrik
soos van Gervasius en Protasius
of van ‘n klank soos minne, orewoet,
douput en furore. In ‘n kaar
wil ek begrawe word,
geen vuur, geen kis.

deur Marlene van Niekerk uit ‘Kaar’ (Human & Rousseau, 2013)

Bookmark and Share

Comments are closed.

  •