fragment-as-inleiding
die middag se long is broos,
verdraaide haikoe, verbreek:
ek bou sillabes teen lig
fragment #1
na-middag in blom:
tatoeëermerke van die son
teen deur en muur
fragment #2
teen badkamerruit
vlek die laatmiddag:
haikoe in vuur
fragment #3
onder in my glas:
klein Verneukpan krakeluur
fragment #4
ry, want die nag kom nader
kruip uit stralekrans:
toevallige cliché
fragment #5
oker, wolke en kragmas:
onnaspeurbare sein,
die oneindige teer
fragment #6
dra jou wol by Laingsburg
verby gerugte van reën:
die Karoo-as-moordenaar
fragment #7
daar was garingbome
naby Swellendam
en ’n vlamrooi Ford
fragment #8
padkaart van droogte
deur beige landskappe
karteer jy ’n matrys
van telegraafpale
sperstrepe
op die pad se grys
fragment #9
stop/go
meditasie in geel
so it goes
Dankie, Etienne. En geluk met jou debuutbundel. Mag dit net van krag tot krag gaan.
Baie geniet, Gisela. Jy is reg op die spoor van die toevalligheid–heerlik.
@Maria, ek waardeer jou terugvoer, baie dankie. Fyn waarneming!
@Andries, jy sal dat ek idees begin kry en aan ‘n boek begin werk en dit terwyl die eksamenmerkwerk soos Ararat voor my le. Ek het juis ‘n paar ander fragmente waaraan ek tans werk, maar wat in die skribbelboekie-stadium is. Dankie vir jou kommentaar ook.
Gisela, maak groot asb. ‘n boek hiervan!
Terdeë geniet, Gisela! Die spel tussen foto en fragment is uiters prettig – die vertaling van die een in die ander, verskillend-in-dieselfde-ekonomie – albei absoluut uniek, deelnemend aan mekaar sonder om aan mekaar te behoort …
Dankie, Marlise.
Heerlik hieraan gelees Gisela. Die gesprek tussen
foto (of film) en gedig fassineer en trek my aan, altyd. Jou haikoes is soos ‘n vars briesie op ‘n hotsige dag en laat my van al die landsprobleme vergeet vir ‘n wyle. Dankie.