Hennie Nortjé. Voor die kerk van Msida, Malta

 

Voor die kerk van Msida, Malta

 

Brul verby julle jaagduiwels,

want die lewe is kort

en swenk onverhoeds

soos die draaie om

die baai van Msida.

En wat baat dan

die vrou in haar nis?

 

’n Armade van weelderige jagte

wieg gelate voor anker.

Die maat is Meditereense,

die bries nog somers en lig.

Maar wat ’n kraaines

is hierdie marina nie.

’n Ware doolhof

van takelwerk, maspale

en benoude kanale.

En watter skipper het

nog tyd vir opkyk en staar

na die vrou omhoog

reeds eeue lank daar in klip?

 

Omring deur versteende duiwe,

staan sy bo die kerkdeur

met ope arms steeds op wag:

die boegbeeld van ’n skip

lankal hier gestrand.

 

Geseënd is die armes van Msida.

Geseënd is die reeds geseëndes.

Geloof troef selfs die dood,

want kyk, ’n klipduif kon sowaar

uit haar stralekrans ontsnap:

’n gekoer, ’n gefladder

vér daar bo

op haar swaar-bemiste hand.

 

© Hennie Nortjé 

 Oktober 2019

 

 

 

 

 

 

 

 

Bookmark and Share

Los kommentaar

 

ERROR: si-captcha.php plugin: GD image support not detected in PHP!

Contact your web host and ask them to enable GD image support for PHP.

ERROR: si-captcha.php plugin: imagepng function not detected in PHP!

Contact your web host and ask them to enable imagepng for PHP.