Thomas Deacon. sakson se tyd

 

sakson se tyd sit die rooi-

vlerk hoenderhaan op sy slaapstok

en kraai die dag oor gatsrante weg

 

pa maak die skaapkraal toe

en steek sy pyp op

hy mikstap moeglyf huis se kant toe

waar ma deur die venster loer

en sien hoe sy pyprook skifsel-wolkies soos fyn-

fyn kantgordyntjies

bokant sy slaphoed maak

 

ná aandete sit almal in die voorhuis

en luister na oupa se draalstem waar hy vinger-

vir-vinger oor die bladsye

van die familiebybel boer :

Hy laat my neerlê in groen weivelde

na waters waat rus is lei Hy my heen

 

agter die klippiesrant sit klasie skawagter

speel ritmies op sy driesnaar blikkitaar

terwyl die jongspan rieldans om die vuur

hulle sing van lang-

beengras wat kopspeel in die wind

vygiebos en sporrie

wat pers en blou met ‘n nat-

veld wêreld trou

 

© Thomas Deacon, 2020

 

 

 

Bookmark and Share

Comments are closed.