Thomas Deacon. na jare van swerf tussen beton

 

na jare van swerf tussen beton

en staal en glas en roet

maak ek weer die plaashek oop

en stap verby die kweperlaning

en vyebome wat hangtak soos vervloektes langs die leidam staan

 

ek slaan my oë op na die plaasopstal

waar sal my hulp vandaan kom

my hulp lê in ou-drome van lamplig wat deur gebarste vensters flikkervlam

en van pa en ma wat voor die koolstoof sit

en ek wat vinger-vir-vinger

met sus en daan en kees en kiet

en langoor oor die letters boer

 

o bring my terug na die ou boesmanland

daar waar my sarie woon

sing ma en pa

terwyl die reuk van moerkoffie

rondom ons dwarrel

 

maar pa en ma lê ingemessel

tussen wit klippies teen die rant

en kees en kiet en sus en daan

en langoor rus vergeel in ‘n laaikas

langs my bed

 

en die plaasopstal staan holoog en wag vir uile van die nag

om op die nok van die dak te kom sit

en met ‘n hoehoeroep die plaashek toe te bid

 

© Thomas Deacon, 2020

 

Bookmark and Share

Een Kommentaar op “Thomas Deacon. na jare van swerf tussen beton”

  1. Gerard Scharn :

    Pure nostalgie!