Alzheimer
die ou man sit op die agtestoep
en vertel van gister se gisters
met knokkelrige vingers
onderstreep hy woord-vir-woord
drup-drup dit harmansdruppel
uit die gisters
die son het rooipapawer
skeurblaar agter die rante weggeglip
maar die ou man sit nog steeds
op sy riempiestoel en hakkel breek-breek woorde oor gister se gisters
die maan skiflyf deur die wolke
en die straatligte skyn dof
waar die ou man hakkel-hakkel
vertel van gister se gisters se gisters
en van ‘n apie op ‘n stokkie
voor sy ma se agterdeur
die aandwind waai koud
oor die agterstoep
as die ou man vertel van sy pa
wat by die hek van die skaapkraal
na hom roep
hoor hoe huil die ou man
as die maan soos ‘n wiggel-
waggeltraan
bolmakiesie oor die hakkies-
rante slaan
© Thomas Deacon, 2020.