Joan Hambidge. Sancire

 

Sancire 

 

Waaroor trauer en treur?

Waarom rou en melancholie?

Wat is verloor en wat is gewen?

langdurig, langsaam

 

in hierdie sanctum

word die proses nooit afgehandel

nie, disparaat en desperaat

oor woorde se onvermoë

 

om presies op te som,

vas te vat, neer te pen,

die anatomie van melancholie;

Klibansky, Panofsky en Saxl

 

neem my na Saturnus

en al die ander planete

wat draai soos hulle draai

die-mure-van-my-hart

 

afgebreek opgebreek uitgebreek

op my pegrimstog in woorde

(soos) Žižek in vreemde lande en kontinente

verbind gebly aan my herkoms

 

in ‘n boomryke landskap nou

teruggekeer na die plek-van-my-jeug

en daar geweet hoe verlies

snags deur die lowerryke tuin sing

 

die bome se wortels gevoed

deur bloed en onvergenoegdheid

totnogtoe ‘n skadu oor die erf

hierdie familieboom van stryd

 

© Joan Hambidge, 2021

 

Bookmark and Share

Comments are closed.