ROU SKRYFBERIGTE
*
ons probeer so goed moontlik
met die vashou van afwesigheid
oor die weg kom
laat-los is nie vir sissies
maar by verstek die aankoms
en vertrek
vir wie nie bang is om aan boord
te gaan
en te lewe
in die moederskip wat reeds
die dood se baar is
om met die wrakversplintering planke
van die gestrande ark
‘n vers te prakseer vir die boord voëls
se begrafnisklanke
*
met ander woorde
daar is dié wat met woorde
die ondenkbare probeer sê
weer en weer
na gelang dit al hoe meer
duidelik word
daar kan geen beduidenis wees
en dan is daar hier dié
wat mét die woorde praat
om hulle aan te spreek
ewe paraat vir luister
en te sê
ek weet nie wat julle uit wil lê
behalwe om oor en oor
elk ‘n halwe oor
waarvan die dieper hoor
moes verwelk
om die ondenkbare maagdevlies
te mog verloor
hierdie leë kelk te wil omtoor
tot ander woorde
*
blink gelewe neus teen die wind
om vir die Ewigheid te wink
gedink dis sommer net vir rinkink en skink
en skielik is dit donker ink
doppie geklink
op môre se stink
*
*
(enso)
wanneer jy Niks skryf
om vir Niet
onderliggend aan die Woord
tot volle Syn te bring
is dit goed
so
om Nêrens te begin in die kring
en beweeg
om stilruimte te maak
vir alTyd
wat Al oopgaaneinde
Iewers is
*
(gevolgtrekking met nawesigheid één gat)
ja-nee
_____________________________________________________________________________________
Hoesê Sosê,
Parys, 12 April 2021
‘n Pynlike en roerende lament.