Werner die Woordskilder. droom digter

 

Droom digter

 

jou metronoom-asemhaal

wieg in jou slaapbors

met ʼn jambiese hartklop

wat onwillekeurig onder beheer

van jou onderbewussyn tik-tak

 

jou drome vers teen jou verhemelte

waar jy die see proe in gedagte

soms roer jy onstuimig

as droomtreine in jou ontspoor

tussen oop lettergreepspore

 

jy swerf tussen spoor en brander

as jy gedigte inkatrol vir later

tot jy ontwaak as die siklus son

deur die môre se binnerym breek

begeesterd word woorde ink op papier

 

©Werner Die Woordskilder, 2021

 

Bookmark and Share

Een Kommentaar op “Werner die Woordskilder. droom digter”

  1. Werner :

    Baie dankie vir die plasing

Los kommentaar

 

*