Eland
Taurotragus oryx
Almal blaai in die glansbrosjure
van die Benchmark Game Breeders-veiling
en beskou Zander Osmers Safari’s
se “young Livingstone Eland Bull”
met elf chevron strepe oor die lyf
op die skerm agter die afslaer.
Die horings L 28 en R 28
met spiraalriwwe by die basis
en strepe oor L 11 en R 10
is G 861 se uitkenmerke
teen die agtergrond van Bosveldbome
en -gras op die foto en video.
Met ’n skerp kap kom Lot 35
onder die hamer en bie die gehoor
op hierdie “uitsonderlike” teelbul.
’n Jagter in kakie met konsulêre pet
jaag ’n rekordprys, beduie wild
en boots ’n eland se geroggel na.
© Johann Lodewyk Marais, 2022