Joan Hambidge. Blowup

 

Blowup

 

Om die clue te vind in ‘n speurverhaal:

waar vind ons die sleutel vir die gedig

se komposisie? In die briewe en dagboeke

of dit wat die digter juis wil verdraai?

 

Min staan opgeskryf oor dié proses

dikwels een van toevallighede en chaos

soos ‘n weerberig wat ‘n storm voorspel

met ‘n dag wat wolkloos voortstroom.

 

Waar begin die inspirasie of idee presies?

By die digter-as-leser of filmkyker wat via

Antonioni ‘n modefotograaf bespied met

‘n onopgeloste raaisel in die agtergrond dalk?

 

In die donkerkamer van die onbewuste (Freud se dis)

ontwikkel alles in ‘n keerweer liewerlee in die polders mis

van dubbel-praat drome wat waarsku en klankloos verdwyn

om die clue te vind in hierdie speurverhaal van jou en myn:

 

opbreekbaar soos ‘n ellips wat uitstel onvertaalbaar skryn …

 

© Joan Hambidge, 2022

 

Bookmark and Share

Comments are closed.