KPTS en Bipolêre versteurings
komplekse posttraumatiese voortdurende stres
tussentye van depressie dan vreugde
ek moenie weer verstar volledig vasvries nie oor
seksuele misbruik gepaardgaande met fisiese geweld
haar metodes met my was afskuwelike aanranding en later
dit kon tog nie maar dit was my lyf onthou
mense het daaroor begin praat – of was dit dalk net
so groep inmengende musikante, vry in uitdrukking
jeumel, jirretjie tog, dis donners befok en arme An nou al hoe oud!
sonder dat ek hoegenaamd bewus was of dat my gedrag
die van ‘n baie bang kind was
maar dit was oor langtermyn skade en ek sou nooit onthou het
as ek nie keer op keer ontsettend gehertraumatiseer is nie
aan die einde van 2020 – die ergste episode van my lewe
en die leidrade het alles in plek geval,waarna psigiaters
my dosis valproaat & valproïensuur opgeskuif het
my gemoedskommelings gestabiliseer het
‘n professor wat deur MRI-skanderings breinskywe ontleed, het op ‘n dag
vir my gesê emosionele skade aan die brein kan nie genees nie
neurofisiologiese bewyse dui daarop dat die ontwikkeling
van KPTSV toegeskryf kan word ondermeer
aan funksionele abnormaliteite in vreesleer
fokale atrofie vind plaas, selle in sommige streke in die brein
word geaffekteer en begin veral by die dorsolaterale prefrontale korteks
ek het breinskade en my pa se pa se seksuele aanrandings aan dogters
is ook al goed bekend, my psige afgebreek in geheueverlies
tot toe: dit het gebeur, niks kan dit verander nie
ma’s wat dit aan hulle dogtertjies en kleindogters – dit ook bestaan
tog word die praat daaroor steeds vermy
tot al die klokke dan sal lui
en ons sal staan en sing
© Annora Eksteen, 2023