Memento
Tussen middelpuntvliedend
en middelpuntsoekend
na iets wat standhou.
Wallace Stevens praat steeds
van die niks wat daar is
en die niks wat is, luisterend
na sneeu. En die misère
van die wind met blare waaiend
oor al die barre ruimtes.
Hier net die sneeu in my hart
nes die maand Mei
sentrifugaal of sentripetaal
vol koue herinneringe
gesinkopeer met glas brekend
in die nag toe iemand roep.
Wie was dit? Dalk jy uit
‘n verre plek reisend weg,
onbewus van dié memorie?
© Joan Hambidge