Bibi Slippers. in die see

 

in die see

 

’n buurvrou het haar ring vir my gegee “vir beskerming”

en ek beskou myself nie as bygelowig nie maar die ring

het aanhou afgly, eers op die kombuisvloer, later

in die wasbak en uiteindelik in die see, terwyl ons snorkel

 

ek het dit te laat voel loskom en kon die ligter sirkel van skielike

niks meer duidelik eien as die silwer band. ek het onmiddellik,

afgeduik en teen alle verwagtinge in die ring

gevind op die seevloer, tussen sand en ander dinge

 

vir dae het ek gegloei met die lig van blinde geluk, die onwaar-

skynlikheid van so ’n goeie uitkoms: wonderwerk aan hand,

gelukskoot om die pinkie, het ek soggens gaan swem

 

maar dae later in die vlak branders het die ring weer afgeglip

dié keer was hy deeglik weg, onvindbaar tussen stukke skulp en klip

’n groot speld in die onmin van golwe

 

vir weke het ek aanhou duik en ook die strand bly fynkam

vir ’n blink ding in die gruis elke weer-kom

na die water nou ook ’n soektog

 

die ring steeds vermis en ek dus onbeskerm loop ek langs ’n ander

kuslyn met my voete in ander getye

 

ek sit nie op die strand nie, ek soek vertroosting van die son

ek swem nie in die water nie, ek soek ’n seëlring in die see

 

© BiBi SLiPPeRS, 2023

 

 

 

 

 

Remember that the AVBOB Poetry Competition reopened on 1 August 2023. Visit our website regularly at https://www.avbobpoetry.co.za/ for editing tips and advice as well as updates about upcoming workshops.