Onus probandi
Vir tweeduisend jaar
dra jy die wete met jou saam
olyfboom in Getsemane,
lewende oerteks van Sy bestaan.
Dat in daardie angsnag
Godsjammerlik alleen
toe Hy in hellevrees langs jou kniel
(jou tenger stam sy angskruk?)
jy tweeduisend jaar later
knoetserig, gekrom, gekurk
aan my, reisiger uit Afrika
Sy godverlate lydensbeker sou oordra.
© Albi Prinsloo, 2023
Remember that the AVBOB Poetry Competition reopened on 1 August 2023. Visit our website regularly at https://www.avbobpoetry.co.za/ for editing tips and advice as well as updates about upcoming workshops.