Nomenklatuur
In die nag blaf ‘n brak in Oranjezicht
perdalks daardie hond van Peter Blum,
wyl Born Free deur my kop draal eenritmig
in ‘n diep beurtnag sonder lig of sig.
My oë tas die donker in, slaan ‘n bres,
in hierdie gedig geskryf voor dooiemans-
deur soekend na Antwoorde en Name
met sinestetiese afleidings en metafore.
Brewwe ligmomente, soos my beelde
(“ek wou so graag ‘n liggie sien”) in
‘n tempora pessima toe my Zippo stondig
flits om nog ‘n sigaret aan te steek.
© Joan Hambidge