Johan Swanepoel. wit rose (M)

 

wit rose

 

vir die soveelste keer

is sy oppad hospitaal toe

 

die keer met ‘n bos wit rose

toegedraai in die Times

se agterblad

 

lekkerruiknuus vasgebind

met ‘n dun stukkie tou

 

jy hoef nie bekommerd te wees nie

selfs nie as hy bloed hoes nie

dit kan dalk goed wees vir hom

kom die dokter se stem

 

vlugtig flikker daar

hoop in sy oë

 

dis wreed dink sy

die ratte wat dokters draai

 

die bedrieglike behendigheid

die kulkunsies en die plasebo’s

 

haar man vroetel met die rose

 

hoe lank is die stukkie tou

wil hy by haar weet

 

© Johan Swanepoel, 2024