Algoritmes om te genees
Gedagtes van hoeka-tye
swalp teen my herinneringe aan:
soos verlede jaar se somer-swaeltjies
tjilp hulle op stellasies
van my denkstelsels
en striduleer soms lang helder episodes
en stories; ander kom in sillabe-fenomene
wat ek stuk-stuk
soos ’n inlegspel
aanmekaar wil mik-en-druk
om sin te maak
uit wat jare t’rug alreeds gebeur het.
Is daar ’n algoritme wat kan bepaal
hoe om dit te verstaan,
dit konkordant te vertaal?
Stap-vir-stap resep-oplossings
vir my om deur ’n rekenaar
te voer om alles wat nou vaag is,
disparaat en deurmekaar,
in probleem-oplossing-operasies
te verwerk sodat dit basies
die data sal vertolk
met binêre funksies
tot helder berekenende instruksies:
hoe om uit die anamneses
sin te maak
van nou af terug tot by die genesis
en dan akkolades van erkenning
te gee aan boeselsvol
demaskering van geheime gedagtes
om my te verbly
en sodoende
die dekressensie van geheuenis te vermy.
© Meyervanrensburg, 2024