Lyklelie
Die jaar van onbekende blomme was in die lug.
En insekte het gestraal, of was daar net bye daar
wat ongepoets kon raak met draers van die kis?
Nee, die bye het hulle angels in takt bewaar.
‘n Enkele oogopslag het laat dink dooigewig is swaar,
maar ek het geweet van Ma se keel en die gewas,
verstaan ek moet stilweg naby stap aan haar,
nog naderby wanneer dit die laaste hekkie is.
Ek, nou amper neëntig, koerant op datum oopgeslaan,
is pas herinner: vyftien jaar, en uiteindelik stoot
‘n lelie met geure van ‘n lyk wat asers trek
‘n blom – net om te vind dit was ‘n slot, ‘n set.
By geboorte kry ‘n mens die angel en die blom,
lewe en dood, in een goddelike pakket.
© Pirow Bekker, 2023
Hierdie gedig is so ná aan perfek as kan kom. Onafgerond? – Asseblief!! Abrup? – indien dit so lyk, dan wel ter wille van die effek wat die digter wou bereik en baie suksesvol bereik het.
Wat is dan ‘n perfekte gedig? Persoonlik wonder ek oor seker woordkeuses, dink dit kon beter gewees het, dog die sentrale idee is sterk.
Marlies Taljard (Inhoudsbestuurder) reageer:
Nicolaas, ek dink nie mens kry perfekte gedigte nie, net soos mens nie perfekte skilderye, foto’s, beeldhouwerke, ens. kry nie. ‘n Gedig is nie iets waarvan die waarde matematies en akkuraat bepaal kan word nie. Goeie gedigte voldoen meestal ten minste aan sekere poëtiese stylkenmerke, maar waar dit daarvan afwyk, is dit funksioneel en maak dit ‘n sterk stelling terwyl dit steeds ‘n gedig bly en nie prosa of ‘n gebrabbel word nie. ‘n Goeie gedig hoef nie deur almal verstaan te word nie en hoef nie in die persoonlike smaak van alle poësielesers te val nie. Dit hoef ook nie “mooi” te wees of “poëtiese woorde” te bevat nie. Gewoonlik kan professioneel opgeleide literêre kritici ‘n gedig na waarde skat. Soos met alle kuns, lê die kuns nie in bepaalde aspekte van die kunswerk nie, maar in die geheel. Persoonlike voor- of afkeure, veral as dit nie gestaaf word deur literêr-teoretiese argumente nie, is nie ‘n maatstaf vir goeie of swak gedigte nie.
Pirow Bekker skryf vir die literêre fynproewer. Gaan lees gerus sy hele oeuvre en die talryke artikels en resensies wat deur die dekades daaroor geskryf is, dan sal jy dalk verstaan hoekom literatore dink hierdie is ‘n indrukwekkende gedig. Om hier ‘n vinnige ontleding en evaluasie van die gedig te verskaf, is gewoon onmoontlik. Mens ontleed nie Bekker se gedigte “vinnig” of voor deeglike agtergrondstudie nie. Ek sal dit na 40 jaar+ in die bedryf nie waag nie.
… where angels fear to tread.
Netjies. Hier en daar abrup en onafgerond, maar oor die algemeen gefokus en sterk.
Nou dit is ‘n puik gedig.