Heenkome
Hoe stil die gange waar die ligte dowwer
van die vloere af glim en ‘n verpleegster
‘n gaap smoor toe jy by haar toonbank
verby gaan op pad na die voordeur
waar ‘n wag stadig opkyk omdat jy
die glasdeure laat oopskuif sodat jy
kan uitstap die naglug in waar iets
eensaam van die nou toe restaurant
oorkant die straat skree en waar die
geparkeerde motors onder ‘n doulaag
blink waaroor jy in jou verbygang met
kamerjas aan ‘n vinnige skaduwee
gooi en dan is jy aan die sykant
van die hospitaal waar jy by jou
eie venster kan in kyk na waar jy
in die bed lê en maak of jy lees,
knoppe in jou kies, hart in jou keel,
gespanne oor die mense om jou,
gekwel oor die lang nag en die
langer dag van môre (dis nie soseer
die jare wat onderkry nie, maar die dae),
so geïntimideer deur die lewe self,
dat jy te lugtig is om te slaap en
wonder hoeveel nagte van hierdie
aard en gehalte lê voor, die soort
waaraan ‘n mens maar kortliks ontkom
deur gou kaalvoet na buite te gaan
voordat jy altyd altyd altyd weer moet
inkom.
© Jaco Fouché, 2024
The AVBOB Poetry Competition reopens on 1 August 2024. Visit our extensive archive at www.avbobpoetry.co.za and find inspiration for your writing by reading the work of other poets in all 11 of South Africa’s official written languages. Follow us on social media for news, announcements and opportunities.
Hou daarvan.