Verloskunde
Ek gaan van die ouerbed af, verbonde kneg,
die koel tuin binne en stap om ‘n dam met water
terwyl ek probeer moed skep wat ek nie vind nie
en weet ek wens ek was elders, iewers, weg.
Soos dit donker word, skyn die vensters uit
en agter een van hulle speel ‘n toneel af
met soveel blydskap dat ek moet gaan staan
en na die opgewonde jong man en vrou kyk.
Hulle troef my in jeugdigheid en liggaamskrag,
ook vooruitsigte waar hulle anderkant die glas
‘n bohaai oor ‘n baba in die arms van die vrou maak,
sy wat, ongehoor deur my, saam met die man lag.
Wanneer hulle my merk, in die ruitskynsel, lig ek my hand
sodat hulle terug groet en iets vriendelik sê.
Buite is daar nou die koms van die volle nag,
daaglikse gedenkstuk van die band, en dit wat wag.
© Jaco Fouché, 2024
The AVBOB Poetry Competition reopens on 1 August 2024. Visit our extensive archive at www.avbobpoetry.co.za and find inspiration for your writing by reading the work of other poets in all 11 of South Africa’s official written languages. Follow us on social media for news, announcements and opportunities.