Paestum – Tombe van die duiker 470 v.C.
Na die lewensfeesmaal klaar geëet
met vriende wat musiek maak
met spel, wyn en liefde vreugdevol geniet
jou voete ongepunt horisontaal
asof jy nog onderstebo bly
plat op die aarde staan,
met die sakkies en penis wat jou saad versprei het
onvrugbaar nou onder gebulte boude
duik jy al 25 eeue lank in bruin silhoeët
met arms vooruit gestrek,
jou rug sierlik geboog
jou kop omhoog
die onbekende in.
Was Hippokrates net al daar
sou jy dalk langer kon baljaar,
maar as jy nou tog net
met sekerheid vir ons kan kom sê
wat esoteries onder daardie oppervlakte lê.
© Dietloff van der Berg, 2024.