Een aand by ‘n musiekstudiebeurskompetisie
sy vra
vat my saam
na daar waar jy so baie gaan
so kom my engel
ek vat jou vanaand
na ‘n klassieke musiekaand
volmaakte komposisies met temas en variasies
uiteensettings ontwikkelings herhalings
en stadige slotakkoorde
‘n opgevoede gehoor
‘n asem wat intrek
‘n Haydn tjellosnaar
sy vra vir my, die stil een
is dit Mozart wat ek hoor
jy weet my skat
Debussy klink wasiger
op die oor
‘n meisie in ‘n rok van donkerrooi satyn
haar vingers dans en dartel
soos feë in Monet se tuin
en vlinders oor die waters
sy sê
vat my weer
ek wil meer en meer leer wat jou so inspireer
my engel wee jy dit was ‘n leeftyd vir my
die stadsale katedrale ouditoriums orkesputte en verhoë
van ou statusteaters van hier en ook
die waters oor
ek drink dit met my tee in die oggend
ek gaan slaap daarmee met my sherrie in die aand
ek haal asem soos frases kunsmusiek want
party speel net note
ander maak musiek
party tref my in my hart
ander tref my
nie
© Annora Eksteen, 2024