kindwees
ek mis die dae van kindwees
van stout wees
in die son
waar oorwinning nog teen vrees kon staan
deur die dade wat ons doen
en verraad nog net verskuil was
in ‘n vroegaand Judassoen
ek mis die dae van kindwees
van waarheid
en van seer
waar die toekoms nog in twyfel was
as ‘n funksie van ‘n wil
en elke lyfding se verstand
nog voor kennis sou verstil
ek mis die dae van kindwees
van lekker lag
en huil
toe heinings nog vir diere was
en deure nog vir wind
en howe nog ‘n uitspraak
met ‘n eed sou kon verbind
ek mis die dae van kindwees
die liefdes
en die leed
ja ek mis toe ons nog klein was
met harte vol van hoop
toe hard werk nog die wens was
om die tyd mee uit te koop
©Andries Fourie
2024