Rigtingsoeker
die wis en onwis
van sy wete
se warboele wette
(wat hy op sy voorhof
dra in ’n boksie)
en ander halfvergete dinge
wat hy dink
dat hy nog moes doen:
die hele skuldbevlekte
konkoksie
bly hom steeds
net na een plek bring
waar hy hoop dat hy weer eens
sy hosannas kleurryk
fleurig uit sal kan sing
hy laat sy bindsandale
losval
in saffierblou klokkiesheide
by die bitter boetebos
en sing
sy sakrale dankpsalm
uit distels
en groenbont onkruide
waar harlekynkewers
in josefsklede
met jantjiesoetjiesdraf rondtalm:
laat insig uit die chaos van die eeue
my denke inundeer
sodat ek dit welluidend hoor
want ek staan hier
sonder staf of vrede
in die hedonisme
van die hede
verhoor my boetgesange nou,
maak my heel, vry
en gee my ’n agenda:
wanneer
om wat te doen
totdat ek my menings en dade
sakrosankt
met eteriese regswese kan versoen
in koloratuurwoorde
met mening
wat ek neerskryf
om vir my sin te maak
spreek
my gewoonweg aan
want ek wil
eenvoudig
voor U Shekinah staan
© Meyer van Rensburg, 2024