Voltrekking
Magdaleen is ene bewerasie
loer sidderend om haar rond
want aanklaers met wet en klippe
staan gereed om haar te wond
hulle dreig en kom al nader
maar ’n man skryf op die grond
hier kom die magdom-menigtes
baldadig en nuuskierig
skynheilig in Millais-purper
en geveinsde Turner-wit
om haar vir goed op haar plek te sit
Jeanne, voorheen alreeds gewond,
staan nou in die vlamme
tog het sy in haar strydersharnas
Orleans en Reims bevry
maar die stemme wat sy bly hoor
laat haar steeds vir Frankryk stry
hier kom die en masse-mense
in Botticelli-blouselblou
in Pierneef-pienk ekstase
om die skouspel dop te hou
Jan Hus word ook gebrandstapel
na sy patristiese perk
van verbanning uit die kerk
maar hy sing paladynpsalms
en ’n oorlog word verwek
hier veg die wilde menigtes
in Walter Battiss-brandoranje
en vurige Rembrandt-rooi
gewonde wankelriges
met tradisionele wapens
wil geregtigheid laat ontdooi
en Martin in sy vryheidsdroom
wil wetsgelykheid laat geskied
maar ’n slaafseun kry net een kans
om ’n koeël die hoof te bied
nou marsjeer ’n maskermassa
in epoptiese albasterwit
’n fakkelgloedgeel treurspel
met vlammend geplante kruise
hulle wil dié tendens verstel
die goewerneur sê: “Gésel hom!”
dan was hy voor die skare
sy hande in ’n kom
terwyl ander met besware
regverdiges verstom
hier is die apatiese gepeupel
verbleikte La Dolce Vita-narre
in ’n kleurbont Fellini-sirkus
’n Tartarus-swart tragedie
steeds dorstig na geplengde bloed:
“Hy kan mos juis
die magdom gebied,
Sy koninkryk laat kom!”
U wil
geskied.
© Meyer van Rensburg, 2024