Ontliggaam
As ek jou soen en ons lepellê
is jou en my vlakke oksitosien
blykbaar versoenbaar
hipotalamies afgeskei
dat liefdesbinding tussen jou en my
verterend kan ontvlam.
Die serotonien is gebalanseer in die masjien
maar sal die hittige lywe se stimuleer
van die brein nog ’n doppie dopamien
van die bynier af laat vuur
of skort ’n paar snuiwe heroïen
om ons gevoelens lekker reg te sien?
Versink in ’n moeras van selle
van geboorte tot geheueverlies
in die stryd teen die draaktand van die tyd
moet elk eers geesgedrewe insig kry en kies
om die bedrading te ontgrens
dat in jou naakte siel jy weet
die werklikheid is metafisies
eers daardeur word jy waarlik mens.
© Dietloff van der Berg, 2024