Geboortes
geboorte is ’n pynlike proses
as die vrugwater breek moet jy uit
uit jou klein donker en beskermende kokon
uit deur die dun kanaal
uit na die wye wêreld
waar vreugdes en frustrasies wag
uit na die lig
waar jy mens kan word
maar as jy regtig, regtig mens wil word
moet nog iets gebeur
die Gees moet deur jou breek
sodat jy uit jou klein ekkige wêreld kan uitbreek
uit die bedompige selfgesentreerdheid
na waar die lig van die liefde skyn
vir jou en deur jou na die wêreld om jou
om in die oortreffende trap te lewe
moet jy weer gebore word
© Neels Jackson, 2024