God se oog
toe ‘n blou dwerg
sku uit die kosmos
se baarmoeder glip
knip die Helix nebula
sy oog
uit die niet kyk hy
af na Katmandu waar
‘n reënboog gebedsvlae
gelate wapper op
die goue koepel
van die son
onder die jakaranda se pers jurk
seën die sadhoe
‘n onaantasbare vrou
verf ‘n bloedrooi Bindi
oor haar derde oog
die reuk van bloeisels
aarsel voor die tempeldeur
bokant yswit lotusblomme
swenk ‘n withalskraai
toe die nebula
sy oog nogeens knip
ontvlam al die vuurlelies
in ‘n stil vallei
© Christiaan Diedericks 2024