Kopbeenversamelaar
in Varanasi kou ‘n Agori
aan die vingers
van dooies
smeer die as van eeue
oor sy lyf
hy slurp die bonatuurlike
uit sy skedelbeker
gekerf uit die gesteelde kopbeen
van ‘n onbekende geliefde
op die brandstapel
die monastiese askeet
– in diepe beswyming –
verorber die soet vlees
van die oggend
mediteer tussen lyke en
Hindoe gesange
hy dans die dans van Shiva
naak op die oewer
van die Ganges
waar dosyne siele elke dag
op die vleuels van kraanvoëls
die eindelose blou bestyg
© Christiaan Diedericks 2024