aan die geringstes
toe hy destyds
oor daai base se tou
getrap het het
hulle hom mos
by die stadspoorte
uitgedryf en met
vrot vrugte gegooi
maar toe ons steeds
gehonger en gedors het
na nuwe afrikaans
het hy nog meer
vir ons gebreyten
hy het vir ons herberg
in die bôrdienghuis
van sy gedigte gegee
hy het self vir ons
in ons tronk
besoek waar ons
toegesluit was
daar het hy ingebreek
en ons met ‘n
groen trui geklee
met sy pen
het hy die politici
laat sweet
hulle het selfs valse klagtes
teen hom ingebring
maar hy het
baksteen vir baksteen
hulle bastille
laat val
en ook die rooiplein
op skelmbos laat kraak
salut!
ons sal oor jou praat
in skole kerke kroeë kafees
en daagliks orals op straat
© Christiaan Potgieter, 2024