krismismaal
medium – kos op lap
vanjaar sal ek my kulinêre ode
aan Jackson Pollock rig
met immerbehepte hale verf,
my krismis ‘n abstrakte polsslag gee
die beskeie weergawe van
splashing madness
van dié jaar se leef
vasgevang in vet,
vuur, sout, suur
ostamatie, balsemkruid,
swartolyf, bokmelkkaas
teenmekaar in phylloblaar
met die gemeste lam se sawwe boud
my astrante loslyf dropcloth abacus
sal splerts in edelspys
ánamemies, juigend drup
ten laaste, een trotse vingerpunt
moet die kataklisme streel
die gulsige drama van fennel,
roosmaryn, salie, lourier
kaolisie tussen skilderkuns
en fynste dis waardeer
in nanag sal ek op hierdie
waansin terug kan blik
deur die valdeur van my kerker kruip
en sal ek teen my hart kan druk:
dit is wat dit is
om ‘n naatlose heiligheid
kos op lap, te kon pleeg
© Anne-Marie Bartie, 2024