Ruimtereis
As glas die spektrum stil en blink verstrooi
om ruimte-tyd en plasma te verwring
metdat swart donkerte die onheil bring
kan plots, in vuur, die heelal weer ontplooi.
Verwronge kleure in die lug, en grou
die somber kolke wat die kosmos buig
om gulsig sterrestelsels in te suig,
wat tyd en ruimte sélf gevange hou.
Verward sal ons, van eie krag gestroop
planete, sterre, skemerte sien val;
dan, agter ons, opnuut: ʼn rooi heelal –
met dof die weg waarlangs die newels loop.
Teësinnig sal die sfere digter word
om stilweg op hulself ineen te stort.
© Jan Pretorius, 2025