ferryman
die ferryman het jou kom haal
en oor die styx geneem
na jy op die rug van ‘n halfblinde
woestynkameel deur hospice
gesleep is, jou longspons steeds
grof, sanderig, gekontoer
vir drie dae het jy aangedoen vir water
in oases waarvan die lug
valer geraak het ter elke besoek
die duine yler teen die lug gekontoer was
en suiwer fris poele na ‘n denkbeeldige
binne aardse ewenaar gemaal het
tot die vorteks eindelik
jou brein hortend ingesluk het
en jou lyf in staatsie was
© Anne-Marie Bartie, 2025