Die wet van Transvaal
(Zoutnet, 30 Oktober 2021)
ek vind ‘n eier in die spens
dit lê daar ligbruin en ovaal
plons dit in ‘n pot met water
maar dit weier om af te daal
ek stel vererg die plaat op hoog
draai die eierwekker tot by tien
spoedig begin die borrels styg
wie nie hoor nie sal maar sien
toe plaas ek die eier in ‘n kelkie
ek tik dit, ek tik dit en dit kraak
eers ‘n skreef en dan ‘n skeur
daarbinne hoor ek iets ontwaak
diep begin dit rommel en raas
dit blaas die asem van ‘n draak
wat uitbars nes ‘n swaelvulkaan
en stink geelwit oor my braak
met die vrot eier in my gesig
swyg ek toe maar en wonder
oor die wet van ou Transvaal
en ook die lewe in besonder
© Jakes Möller, 2024