Klaarte
Louis Esterhuizen
Klaarte is die bekroonde digter Louis Esterhuizen se twaalfde digbundel en bevat merendeels lewensbeskoulike, besinnende verse oor die liefde tussen twee ouerwordende persone, maar ook aktualiteitsverse oor die geskiedenis, ekologie en die digkuns self.
Verrassend is die eerlike dog sardoniese wyse waarmee daar soms gekyk word na nypende kwessies soos veroudering, siekte en politiese omwentelinge te midde van die verse met ’n sterk deurlopende narratiewe lyn.
Trouens, hierdie bundel kan sekerlik beskou word as ’n memoires in versvorm en wat sterk herinner aan die Japannese lewensbeskouing wabi-sabi waarvolgens daar skoonheid gevind kan word in gebrokenheid, en vreugde in imperfeksie, transformasie en verganklikheid.
Oor die outeur
Esterhuizen debuteer met die digbundel Stilstuipe (1986), waarna Op die oog af (1988), Die onderwaterweg (1996), Patzers (1997), Opslagsomer (2001), Liefland (2004) en Sloper (2007) volg.
Sy agtste digbundel, wat die water onthou, verskyn in 2010 en word met die Protea Poësieprys vir 2011 bekroon. Dié bundel was ook genomineer vir die UJ prys vir Letterkunde en die ATKV Woordveertjie vir Poësie (2011). Hierna volg Amper elders (2012), Die afwesigheid van berge (2014) en Die gladde stiltes in glas in 2020.
Etlike van sy verse is in ’n verskeidenheid bloemlesings opgeneem, te wete Poskaarte, Die Afrikaanse Poësie in ’n 1000 en enkele gedigte, Groot Verseboek, Nuwe Verset, Maskers en mure, flikker-gram, en Merang.
Ná ’n onderwysloopbaan van 25-jaar was hy van 2002 tot 2016 bestuurder van Protea Boekwinkel op Stellenbosch.
[Naledi, 2025. ISBN: 9781067234546. SAGTEBAND. FORMAAT: 213 X137. PRYS: R260.00. 124 bladsye. ISBN 9781067234546]