Die dood as solesisme
JdL
Versakings en verdriete talm in drome:
nagtelike besoekers bot nes kaal bome.
‘n Fout in ‘n teks sou jy subiet opmerk;
rymdwang of metriese sinkplate ópskerp.
Wyl ek steeds memories oor jou opteken:
(oplopend, moeisaam) oor iets soos afreken.
Jy was dalk reg en gereed vir ‘n laaste pastil,
wyl ek stik aan nog ‘n paragoge én passim.
Die dood (raai ons) is ‘n teks ongeredigeer
sonder sub, proefleser of taalsuiweraar.
© Joan Hambidge, 2025